పొట్ట తగ్గించుకోండి ఇలా ..

హెల్త్ ఎక్స్ పర్ట్ సలహా ప్రకారం జిమ్ కి వెళ్ళడం వల్ల పొట్ట తగ్గదు. అయితే జిమ్ కి వెళ్ళినప్పుడు ఏమి చేయాలో ఏమి చేయకూడదో అనే వివరం తెలిసుండాలి..

పొట్ట తగ్గించుకోవటానికి అన్నిటికంటే పెద్ద ఆటంకం ఎలా చేయాలో తెలియకపోవటమే. మీరు ఒక చిన్న విషయం పరీక్షించండి.  దగ్గరలో ఏదైనా జిమ్ ఉంటే వెళ్లి చూడండి. అక్కడ లావాటి మహిళలు నేల లేదా మెషిన్ మీద పడుకొని ఎన్నో రకాలైన క్రంచెస్ (క్రంచెస్ అంటే సాధారణంగా మోకాళ్ళను ముక్కు దగ్గరకు, లేదా ముక్కును పొట్ట దగ్గరకు తీసుకు వెళ్ళే వ్యాయామాలు) చేస్తూ కనిపిస్తారు. ఇది చాలా ప్రసిద్ధ వ్యాయామం.

ఈ వ్యాయామాన్ని ఒకటి రెండు నెలలు నిలకడగా చేయటం వల్ల నడుము కొలతలో కొన్ని సెంటీమీటర్ల తగ్గుదల, పొట్ట తేలిక అవ్వటం వంటి ఫలితాలు ఉంటాయి. అయితే, మేడంగారూ, జాగ్రత్తగా గమనించండి - క్రంచెస్ చేయటం వల్ల కేవలం పొట్ట తేలిక అవుతుంది అంతే. ఈ వ్యాయామం పొట్ట చదునుగా ఉన్నవారికి, ఆబ్స్  చేసేవారికి పనికి వస్తుంది. లావుగా ఉంటే కనుక క్రంచెస్ ఒకటే కాదు, ఫుల్ బాడీ ఎక్సర్ సైజు చేయాల్సి ఉంటుంది. మీకు నమ్మకం కుదరకపోతే ఎవరైనా మంచిపేరు గల హెల్త్ ప్రొఫెషనల్ ని అడిగి నిర్ధారించుకోండి. క్రంచెస్ చేయటం వల్ల అసలు ఉపయోగం ఏమి లేదని మేము చెప్పటం లేదు, అయితే లావాటి శరీరం గల వారికి మొత్తం వ్యాయామంలో  క్రంచెస్ కేవలం పది శాతమే ఉంటేనే మంచిది.

పొట్ట తగ్గించుకునే వ్యాయామాలు కొన్ని

పరిగెత్తడం, సైకిల్ తొక్కడం, పీటీ, క్రాస్ ట్రెయినర్, బర్పీ, స్క్వాట్ త్రస్ట్, బాక్స్ జంప్, తాడాట, కెటిల్ బెల్, డంబెల్ స్వింగ్ - ఇవన్నీ పొట్ట తగ్గించేవే. మీకు ఇంటర్నెట్ సౌలభ్యం ఉన్నట్టైతే వీటిలో తెలియనివాటి గురించి ఇక్కడ ఇచ్చిన పేర్లతోనే సెర్చ్ చేసి బొమ్మలు చూస్తే మీకే అర్థమైపోతుంది వాటిని ఎలా చేయాలో.

పొట్ట తప్పకుండా తగ్గుతుంది

మీరు జిమ్ కి గాని పార్కుకి గాని వెళ్ళండి. మీ శరీరంలో దాదాపు అన్ని భాగాలు పని చేసేటువంటి వ్యాయామాలు ఎంచుకోండి. ఒక విషయాన్ని మాత్రం చాల జాగ్రత్తగా గుర్తుంచుకోవాలి సుమా. అదేంటంటే స్పాట్ రిడక్షన్ లాంటిది - అంటే కేవలం ఒకే భాగం కరిగేలా వ్యాయామం ఉండదు. కేవలం నడుము అంటే నడుమే, పొట్ట అంటే పొట్టే తగ్గే వ్యాయామాలు చేయించటం చేయటం ప్రొఫెషనల్ బాడీ బిల్డర్స్ కి మాత్రమే సాధ్యం అని తెలుసుకోండి.

పొట్ట గురించి ఆలోచించటం మానేసి బరువు గురించి ఆలోచించండి. బరువు తగ్గడం కోసం కార్డియో ( పరుగు, పీటీ లాంటివి) తో పాటు వెయిట్ ట్రైనింగ్ కూడా అవసరం. జ్ఞానవంతంగా వ్యవహరిస్తే సమయం, డబ్బు రెండూ వ్యర్థం కాకుండా ఆదా చేసిన వారవుతారు. మీకు గనక సమయం ఎక్కువ ఉంది, అది గడవటం లేదు అనుకుంటే ఫరవాలేదు కానీ తొందరగా పొట్ట తగ్గాలంటే మాత్రం మీ వ్యాయామ క్రమంలో స్ట్రెచెస్ ను వీలైనంత తక్కువ చేయండి. ఎందుకంటే వీటి వల్ల మీకు ఏ ఉపయోగమూ ఉండదు. అవసరాన్ని మించి కార్డియో చేయటం వల్ల కాళ్ళ కండరాలు బలహీన పడతాయి. ప్రతిరోజూ పరిగెత్తాల్సిన అవసరం లేదు. తేలిక పాటి వ్యాయామాలు బరువును తగ్గించలేవు. మీరు ఇరవై నిముషాల కార్డియో చేయండి, దాని తరువాత వెయిట్ ట్రైనింగ్, తరువాత చిన్న చిన్న  స్ట్రెచెస్ చేసి హాయిగా ఇంటికి వెళ్ళండి. అప్పుడప్పుడు కార్డియో కూడా చేయకండి. ఒట్టి వామప్, హెవీ వెయిట్ ట్రైనింగ్ చేయండి. కొన్నిసార్లు జిమ్ కి వెళ్ళటం కుడా మానేసి పార్క్ లో సమయం గడపండి. మీ పరిమితి తెలుసుకొని క్రమంగా దాన్ని దాటటానికి ప్రయత్నించండి. పొట్ట దానంతట అదే తగ్గి పోతుంది.

జిమ్ లో ఉన్న అన్ని బరువులను ఒక చోట నుంచి ఇంకో చోటికి మార్చటం అనే వ్యాయామం ఒక చిన్న ప్లాస్టిక్ డబ్బా పెట్టుకొని దాని మీద గంట సేపు ‘వన్ టూ వన్ టూ’ చేయటం కన్నా పది రెట్లు ఉత్తమం. ఈ నిజాన్ని స్వీకరించండి ఏంటంటే బరువుని తగ్గించే వ్యాయామం ఎప్పుడు స్టైలిష్ గా ఉండదు. అది చెడ్డది, ఆయాసం కలిగించేది అయి ఉంటుంది!

బాక్స్ మేటర్ :

అప్పుడప్పుడు ఇవీ ప్రయత్నించండి:

• సరిగ్గా జిమ్ మూసే వేళకు అక్కడికి వెళ్ళండి. చిందర వందరగా ఉన్న బరువు లన్నిటినీ పది నిమిషాల్లో వేటి చోటులో వాటిని సర్దేయండి.
• సరిగ్గా జిమ్ తెరిచే వేళకు అక్కడికి వెళ్ళండి. జిమ్ లో ఉన్న డంబెల్స్, ప్లేట్స్, రాడ్స్ వంటివి ఒక చోట నుంచి తీసి మరో చోటికి చేర్చి తిరిగి యథాస్థానంలో ఉంచండి.
• రోజు మీరు రన్నింగ్ చేస్తుంటారు కదా. అలా కాకుండా ఒకరోజు జిమ్ కి వెళ్లి అక్కడ బరువైన రెండు  డంబెల్స్ ను రెండు చేతుల్లో పట్టుకొని జిమ్ లోనే అటూ ఇటూ నడవండి. దీన్ని ఫార్మర్స్ వాక్ అంటారు.
• పెద్ద వాహనంది ఏదైనా పాత టయరు దొరికితే, నుంచొని ఉండి దాన్ని పెద్ద సుత్తితో ఇష్టం వచ్చినట్టు బాదండి అది నుజ్జు నుజ్జు అయ్యేదాకా.

గృహ శోభ

మోహిత,

12 అక్టోబర్ 2014